កម្មវិធីវិទ្យុ
ព័ត៌មានពេលព្រឹក៖ ៨ មិថុនា ២០២១
ព័ត៌មានអំពីកម្ពុជាមានដូចជា កម្ពុជារកឃើញវីរុសកូវីដបំប្លែងប្រភេទថ្មី ខណៈករណីឆ្លងមិនទាន់ថមថយនៅឡើយ។ តុលាការគ្រោងបើកសវនាការសំណុំរឿងលោក រ៉ុង ឈុន ស្របពេលសង្គមស៊ីវិលទាមទារឲ្យដោះលែងអ្នកទោសមនសិការ។ រីឯព័ត៌មានអន្តរជាតិវិញមានដូចជា ប្រទេសចិនរៀបចំកិច្ចប្រជុំថ្នាក់រដ្ឋមន្ត្រីការបរទេសអាស៊ាន ខណៈខ្លួនកំពុងប្រកួតប្រជែងជាមួយអាមេរិក។ ប្រទេសចិនខឹងសម្បានឹងសមាជិកព្រឹទ្ធសភាសហរដ្ឋអាមេរិកដែលធ្វើទស្សនកិច្ចទៅដែនកោះតៃវ៉ាន់។ ក្រុមឧទ្ទាមតាលីបង់ក្នុងប្រទេសអាហ្វហ្គានីស្ថានសន្យាថានឹងមិនសងសឹកចំពោះពលរដ្ឋអាហ្វហ្គានីស្ថានដែលធ្លាប់បម្រើការងារឲ្យកងកម្លាំងយោធាបរទេសទេ។ អ្នកស្ទង់មតិក្នុងប្រទេសបារាំង និងអាល្លឺម៉ង់បង្ហាញថា សហរដ្ឋអាមេរិកក្រោមការដឹកនាំរបស់លោក Biden ក្នុងរយៈពេលបីខែនេះពុំមានអ្វីផ្លាស់ប្តូរនោះទេ។ រថភ្លើងបុកគ្នាក្នុងប្រទេសប៉ាគីស្ថានបណ្ដាលឲ្យមនុស្ស៤០នាក់ស្លាប់ និងរបួសជាង១០០នាក់។ លោក Biden ពង្រីកបញ្ជីឈ្មោះក្រុមហ៊ុនចិនដែលត្រូវដាក់ទណ្ឌកម្ម៕
ព័ត៌មានពេលរាត្រី៖ ៨ មិថុនា ២០២១
ព័ត៌មានអំពីកម្ពុជាមានដូចជា ចិនបញ្ជូនវ៉ាក់សាំង១លានដូសទៀតមកកម្ពុជា ខណៈរដ្ឋាភិបាលសម្រុកចាក់បង្ការដល់ពលរដ្ឋឲ្យបាន១០លាននាក់។ សហជីពដាក់ពាក្យបណ្តឹងទៅក្រសួងការងារទាមទារឲ្យក្រុមហ៊ុន NagaWorld បញ្ឈប់ការបណ្តេញបុគ្គលិក។ នៅចំពោះមុខរដ្ឋមន្ត្រីក្រសួងមហាផ្ទៃកម្ពុជា តំណាងទូតអាមេរិកអំពាវនាវឲ្យដោះលែងសកម្មជនបរិស្ថាន។ ក្រសួងសុខាភិបាលឲ្យដឹងថា មនុស្ស១២នាក់ទៀតស្លាប់ដោយសារជំងឺកូវីដ១៩ ខណៈចំនួនអ្នកឆ្លងបន្តកើនខ្ពស់។ បទពិសោធន៍ជនភៀសខ្លួនខ្មែរនៅអាមេរិកទសវត្សរ៍៨០និង៩០៖ រូបថតជនភៀសខ្លួនខ្មែរនៅក្រុង Chicago «ធ្វើឲ្យបទពិសោធន៍ផ្ទាល់ខ្លួនខ្ញុំមានន័យ»។ រីឯព័ត៌មានអន្តរជាតិវិញមានដូចជា អ្នកស្រី Harris និយាយសង្កត់ធ្ងន់ពីការមិនឲ្យពលរដ្ឋអាមេរិកឡាទីនធ្វើចំណាកស្រុកមកសហរដ្ឋអាមេរិក។ កាកបាទក្រហមមីយ៉ាន់ម៉ាបង្កើនការគាំទ្រដល់ប្រជាជនរាប់សែននាក់។ ជនសង្ស័យជាង ២០០ នាក់ត្រូវបានចាប់ខ្លួននៅប្រទេសអូស្ត្រាលីពីបទឧក្រិដ្ឋកម្ម។ អាជ្ញាធរប៉ាគីស្ថានស៊ើបអង្កេតមូលហេតុនៃរថភ្លើងបុកគ្នាស្លាប់ជាង៥០នាក់ និងព័ត៌មានអន្តរជាតិសំខាន់ៗមួយចំនួនទៀត៕
