កម្មវិធីវិទ្យុ
ព័ត៌មានពេលព្រឹក៖ ៨ មេសា ២០២១
ព័ត៌មានសំខាន់ៗអំពីកម្ពុជាមានដូចជា សំណុំរឿងអតីតមេបញ្ជាការជើងទឹកខ្មែរក្រហម មាស មុត ជាប់គាំង។ សង្គមស៊ីវិលជំរុញឲ្យទុកចិត្តលើវ៉ាក់សាំង ខណៈនាយករដ្ឋមន្ត្រីព្រមានមន្ត្រីរាជការដែលមិនចាក់វ៉ាក់សាំងអាចបាត់បង់ការងារ។ អាជីវករនៅភ្នំពេញបារម្ភកាន់តែខ្លាំងអំពីការឆ្លងជំងឺកូវីដ១៩ ខណៈរដ្ឋាភិបាលរឹតបន្តឹងការធ្វើដំណើរឆ្លងខេត្ត។ រីឯព័ត៌មានអន្តរជាតិវិញមានដូចជា អ្នកស្រាវជ្រាវផ្អាកការធ្វើតេស្តវ៉ាក់សាំង AstraZeneca លើកុមារ។ ប្រទេសឥណ្ឌូនេស៊ីត្រៀមនាវាមន្ទីរពេទ្យដើម្បីជួយសង្គ្រោះជនរងគ្រោះដោយសារព្យុះស៊ីក្លូន។ អាមេរិកនិងអ៊ីរ៉ង់ចាត់ទុកការចរចាដោយប្រយោលលើកិច្ចព្រមព្រៀងនុយក្លេអ៊ែរថាជាជំហានស្ថាបនាមួយ។ ចិនព្រមានក្រុងវ៉ាស៊ីនតោនមិនឲ្យធ្វើពហិការការប្រកួតកីឡាអូឡាំពិករដូវរងា។ កិច្ចពិភាក្សារវាងមេដឹកនាំសហភាពអឺរ៉ុបនិងតួកគី ចាប់ផ្តើមដោយភាពឆ្គាំឆ្គង ដោយមេដឹកនាំជាស្ត្រីរបស់គណៈប្រតិភូអឺរ៉ុប មិនមានកៅអីអង្គុយសមរម្យ។ ជនភៀសខ្លួនរ៉ូហ៊ីងយ៉ារាប់ពាន់នាក់នៅឥណ្ឌារស់នៅក្នុងភាពភ័យខ្លាចការចាប់បញ្ជូនត្រឡប់ទៅប្រទេសដើមវិញ៕
ព័ត៌មានពេលរាត្រី៖ ៨ មេសា ២០២១
ព័ត៌មានសំខាន់ៗអំពីកម្ពុជាមានដូចជា កម្មករជិត៥០នាក់នៅភ្នំពេញត្រូវបានរកឃើញឆ្លងកូវីដ១៩ ដែលបង្កជាក្តីបារម្ភពីការផ្ទុះឆ្លងនៅតាមរោងចក្រ។ មនុស្ស២នាក់ទៀតស្លាប់ដោយសារជំងឺកូវីដ១៩ ខណៈមានអ្នកឆ្លងថ្មីជាង១០០នាក់ទៀត។ ការចាក់វ៉ាក់សាំងកូវីដ១៩ ស៊ីណូវ៉ាក់នៅកម្ពុជា៖ ក្រុមអាទិភាព លក្ខខណ្ឌសុខភាព និងកន្លែងចែកចាយ។ កិច្ចសន្ទនារវាងអ្នកយកព័ត៌មានឲ្យ VOA អំពីការឆ្លងរាលដាលនៃវីរុសកូរ៉ូណាក្នុងរោងចក្រកាត់ដេរនិងនៅរាជធានីភ្នំពេញ។ នៅក្នុងកម្មវិធី Hello VOA ថ្ងៃនេះ មានការពិភាក្សាអំពី «ផលនៃអំពើពុករលួយទៅលើការឆ្លងជំងឺកូវីដ១៩ក្នុងសហគមន៍នៅកម្ពុជា»។ រីឯព័ត៌មានអន្តរជាតិវិញមានដូចជា លោក Biden នៅរក្សាជំហរពាណិជ្ជកម្មតឹងរ៉ឹងរបស់លោក Trump ចំពោះប្រទេសចិន។ លោក Biden នឹងប្រកាសអំពីវិធានការថ្មីដើម្បីដោះស្រាយអំពើហិង្សាដោយកាំភ្លើង។ និយតករអឺរ៉ុបចាត់ទុកបញ្ហាកំណកឈាមថាជាផលប៉ះពាល់ដ៏កម្របំផុតនៃការចាក់វ៉ាក់សាំងកូវីដ១៩ របស់ក្រុមហ៊ុន AstraZeneca។ សហរដ្ឋអាមេរិកនិងអ៊ីរ៉ាក់ចាប់ផ្ដើមពិភាក្សាអំពីការដកកងទ័ពអាមេរិកចេញពីអ៊ីរ៉ាក់ និងព័ត៌មានផ្សេងៗទៀត៕
