កម្មវិធីវិទ្យុ
ព័ត៌មានពេលព្រឹក
ព័ត៌មានសំខាន់ៗមានដូចជា រដ្ឋាភិបាលក្រុងវ៉ាស៊ីនតោនបានបញ្ជូននាវាចម្បាំងចំនួន ៤ គ្រឿងទៅកាន់សមុទ្រចិនខាងត្បូងចាប់តាំងពីចុងខែមេសាមក ដើម្បីបង្ហាញថា ជំងឺកូវីដ១៩នឹងមិនបញ្ឈប់សហរដ្ឋអាមេរិកមិនឲ្យប្រឆាំងនឹងការវាតទីដែនសមុទ្ររបស់ចិនទេ។ កាលពីប៉ុន្មានសប្តាហ៍មុននេះ ប្រទេសចិនបានប្តូរឈ្មោះកូនកោះចំនួន ២៥ និងថ្មប៉ប្រះទឹកចំនួន ៥៥ កន្លែង នៅក្នុងសមុទ្រចិនខាងត្បូង ដែលលាតសន្ធឹងពីទីក្រុងហុងកុងទៅដល់កោះ Borneo ដើម្បីពង្រឹងការទាមទាររបស់ខ្លួននៅសមុទ្រចិនខាងត្បូង។ ជំនួញខាងលក់គ្រឿងស្រវឹងកំពុងលក់ដាច់នៅក្នុងសហរដ្ឋអាមេរិក នៅពេលមានការរាតត្បាតជាសាកលនៃជំងឺកូវីដ១៩ ប៉ុន្តែក្រុមអ្នកជំនាញខាងសុខភាពមានកង្វល់ថា ការផឹកស្រាច្រើនអាចនាំឱ្យញៀន។ ភ្នំភ្លើង Puhahonu នៅរដ្ឋហាវៃ សហរដ្ឋអាមេរិក ត្រូវបានគេរកឃើញថា ជាភ្នំភ្លើងធំជាងគេបំផុតនៅលើពិភពលោក៕
ព័ត៌មានពេលរាត្រី
ព័ត៌មានអំពីកម្ពុជាមានដូចជា ស្ថានទូតថៃប្រចាំនៅកម្ពុជាលើកឡើងថា ពួកគេមិនមានព័ត៌មានទាក់ទងនឹងការបាត់ខ្លួនរបស់សកម្មជនថៃទេ ខណៈអាជ្ញាធរកម្ពុជាអះអាងថាពួកគេក៏មិនស៊ើបអង្កេតករណីនេះដែរ បើគ្មានបណ្ដឹងពីក្រុមគ្រួសារ។ អង្គការសង់ត្រាល់ ថា កម្មករជាង ១ ម៉ឺន នាក់ បានតវ៉ា ដោយសាររោងចក្រព្យួរការងារ បញ្ឈប់កម្មករ និងបិទរោងចក្រ ដោយមិនគោរពច្បាប់។ កម្មវិធី Hello VOA មានកិច្ចពិភាក្សាអំពី «ការទទួលបានវ៉ាក់សាំងបង្ការជំងឺកូវីដ១៩ ដោយឥតគិតថ្លៃសម្រាប់ទាំងអស់គ្នា»។ ព័ត៌មានអន្តរជាតិវិញមាន ពលរដ្ឋអាមេរិកាំងទៅបោះឆ្នោត ខណៈមានជំងឺរាតត្បាតនិងបាតុកម្ម។ សពរបស់លោក George Floyd នឹងត្រូវបញ្ចុះនៅថ្ងៃអង្គារស្អែកនេះ។ អាជ្ញាធរសហរដ្ឋអាមេរិកជំរុញឲ្យក្រុមបាតុករដែលតវ៉ាករណីស្លាប់លោក George Floyd ធ្វើតេស្តរកជំងឺកូវីដ១៩។ ទីផ្សារភាគហ៊ុនសកលលោកឡើងថ្លៃខ្លាំងនៅថ្ងៃច័ន្ទនេះ ដោយសារតែភាពប្រសើរឡើងលើសការរំពឹងទុកនូវអត្រាគ្មានការងារធ្វើក្នុងសហរដ្ឋអាមេរិក។ អង្គការមនុស្សធម៌អាចខ្វះលទ្ធភាពជួយ ប្រសិនបើមានការផ្ទុះជំងឺកូវីដ១៩ ក្នុងជំរំជនភៀសខ្លួន Rohingya។ បេសកជនសហរដ្ឋអាមេរិកពិភាក្សាសន្តិភាពនៅអាហ្វហ្គានីស្ថានជាមួយក្រុមតាលីបង់និងប៉ាគីស្ថាន៕
