កម្មវិធីវិទ្យុ
ព័ត៌មានពេលព្រឹក
ព័ត៌មានសំខាន់ៗអំពីកម្ពុជារួមមាន មន្ត្រីកម្ពុជាថា កសិករត្រូវពង្រឹងគុណភាពនិងសុវត្ថិភាពកសិផល ទើបអាចនាំចេញទៅចិន។ សេចក្តីព្រាងច្បាប់ហាមប្រាមការស្លៀកពាក់មិនសមរម្យត្រូវបានគេមើលឃើញថា ជាការគំរាមកំហែងសិទ្ធិសេរីភាពរបស់ស្ត្រី។ រីឯព័ត៌មានអន្តរជាតិវិញមានដូចជា ចំណុចសំខាន់ ៤យ៉ាងដែលត្រូវដឹង បន្ទាប់ពីរដ្ឋាភិបាលអាមេរិកលុបចោលសេចក្តីណែនាំស្តីអំពីទិដ្ឋាការរបស់និស្សិតបរទេស។ អ្នកជំនាញសុខាភិបាលអាមេរិក ថា ពិភពលោកនឹងមិនអាចលុបបំបាត់វីរុសដែលបង្កជាជំងឺកូវីដ១៩ ទាំងស្រុងនោះទេ។ ប្រធានាធិបតីបារាំងធ្វើទស្សនកិច្ចនៅប្រទេសលីបង់ បន្ទាប់ពីហេតុការណ៍ផ្ទុះដ៏ខ្លាំងក្លាមួយបានកើតឡើង។ មនុស្ស ១៦នាក់ បានស្លាប់ដោយសារគ្រោះទឹកជំនន់ដោយសារភ្លៀងធ្លាក់ខ្លាំងនិងគ្រោះបាក់ដីនៅកូរ៉េខាងត្បូង។ ពលរដ្ឋអាមេរិកប្រមាណ ១លាន ២សែននាក់ ដាក់ពាក្យសុំជំនួយអត់ការងារធ្វើពីរដ្ឋ។ ក្រុមហ៊ុន Facebook លុបសាររបស់លោក Trump ជាលើកដំបូង និងព័ត៌មានអន្តរជាតិផ្សេងទៀត៕
ព័ត៌មានពេលរាត្រី
ព័ត៌មានសំខាន់ៗអំពីកម្ពុជាមានដូចជា ទឹកទន្លេសាបកម្ពុជាធ្លាក់ចុះដល់កម្រិតមិនដែលមានពីមុនមក ខណៈមានការព្រួយបារម្ភអំពីទំនប់វារីអគ្គិសនី។ សេចក្តីព្រាងច្បាប់ហាមប្រាមការស្លៀកពាក់មិនសមរម្យត្រូវបានគេមើលឃើញថា ជាការគំរាមកំហែងសិទ្ធិសេរីភាពរបស់ស្ត្រី។ សហគមន៍ខ្មែរនៅរដ្ឋកាលីហ្វ័រញ៉ាបង្កើនយុទ្ធនាការជំរុញឲ្យពលរដ្ឋខ្មែរសញ្ជាតិអាមេរិកបំពេញជំរឿនឆ្នាំ ២០២០។ អ្នកគាំទ្រលោករ៉ុង ឈុនដែលជាមេដឹកនាំសហជីពស្វែងរកអន្តរាគមន៍ពីអង្គទូតនានា ក្រោមការឃ្លាំមើលយ៉ាងតឹងរ៉ឹងពីកម្លាំងសន្តិសុខ។ រីឯព័ត៌មានអន្តរជាតិវិញមានដូចជា ក្រុមអ្នកបោះឆ្នោតឯករាជ្យនៅសហរដ្ឋអាមេរិកចេញទៅបោះឆ្នោត ដោយផ្តោតលើបញ្ហាចម្បងក្នុងប្រទេស ជាជាងមនោគមវិជ្ជានយោបាយ។ ចំនួនករណីឆ្លងនិងស្លាប់កើនឡើងខ្ពស់បំផុតដែលមិនធ្លាប់មានពីមុននៅអូស្ត្រាលី។ លោកប្រធានាធិបតីត្រាំភ្ជាប់វ៉ាក់សាំងការពារជំងឺកូវីដ១៩ទៅនឹងពេលវេលានៃការបោះឆ្នោតនៅខែវិច្ឆិកា ។ ការប្រជែងរបស់រុស្ស៊ីដើម្បីផលិតវ៉ាក់សាំងកូវីដ១៩បង្កការព្រួយបារម្ភដល់បស្ចិមប្រទេសពីប្រសិទ្ធភាពនិងសុវត្ថិភាព។ ពលរដ្ឋលីបង់ដែលខឹងសម្បារ ស្តីបន្ទោសការផ្ទុះនោះលើអំពើពុករលួយនិងការរៀបចំចាត់ចែងមិនបានល្អរបស់វរជននយោបាយ។ ទឹកជំនន់ ការបាក់ដី បានបំផ្លាញផ្នែកភាគច្រើននៃប្រទេសស៊ូដង់ សម្លាប់មនុស្សយ៉ាងតិចណាស់ក៏១០នាក់ និងព័ត៌មានអន្តរជាតិផ្សេងៗទៀត៕
