កម្មវិធីវិទ្យុ
ព័ត៌មានពេលព្រឹក៖ ៦ កក្កដា ២០២១
ព័ត៌មានអំពីកម្ពុជាមានដូចជា អ្នកវិភាគថា ទំនាក់ទំនងកាន់តែធ្លាក់ចុះដុនដាប ក្រោយអាមេរិកបញ្ចប់កម្មវិធីអាហារូបករណ៍យោធាដល់និស្សិតកម្ពុជា។ អាជ្ញាធរស្ទាក់ស្ទើរបញ្ចេញព័ត៌មាននៃការចាក់ថ្មចូលទឹកទន្លេក្នុងភូមិសាស្ត្រអរិយក្សត្រ ខណៈពលរដ្ឋបារម្ភការបណ្តេញចេញ។ រីឯព័ត៌មានអន្តរជាតិវិញមានដូចជា ការបែកធ្លាយឯកសារផ្ទៃក្នុងបង្កើតក្តីបារម្ភក្នុងប្រទេសថៃស្តីពីប្រសិទ្ធភាពវ៉ាក់សាំង Sinovac របស់ចិន។ សវនាការក្តីព្រហ្មទណ្ឌរបស់អ្នកស្រី Aung San Suu Kyi នៃប្រទេសមីយ៉ាន់ម៉ា កំពុងប្រព្រឹត្តទៅមុខ។ ព្រះនាងម្ចាស់ Kate នៃប្រទេសអង់គ្លេស ដាក់ព្រះកាយស្ថិតនៅឆ្ងាយពីគេបន្ទាប់ពីមានពាក់ព័ន្ធនឹងអ្នកកើតជំងឺកូវីដ១៩។ ក្រុមប្រទេសនាំប្រេងចេញ OPEC បន្តការពិភាក្សាគោលនយោបាយប្រេង ស្របពេលមានការប្រឆាំងជំទាស់ពីប្រទេសអេមីរ៉ាតអារ៉ាប់រួម។ សកម្មភាពពាណិជ្ជកម្មក្នុងតំបន់ចាយប្រាក់អឺរ៉ូ មានការកើនឡើងក្នុងខែមិថុនា ស្របពេលដែលការបិទខ្ទប់ដោយសារជំងឺកូវីដ១៩ ត្រូវបានដកចេញ។ អ្នកជំនាញថា គ្រោះរាំងស្ងួតធ្ងន់ធ្ងរនិងភ្លើងឆេះព្រៃបង្ហាញពីការប្រែប្រួលបរិស្ថាន៕
ព័ត៌មានពេលរាត្រី៖ ៦ កក្កដា ២០២១
ព័ត៌មានអំពីកម្ពុជាមានដូចជា រដ្ឋបាលខេត្តកោះកុងផ្តល់ដីជាង១ពាន់ហិកតាឱ្យក្រសួងការពារជាតិ រៀបចំ«តំបន់វិស្សមកាល»យោធា ខណៈពលរដ្ឋប្រឈមការបណ្តេញចេញ។ មនុស្ស៣១នាក់ទៀតស្លាប់ដោយសារជំងឺកូវីដ១៩ ខណៈអាជ្ញាធរកម្ពុជាបញ្ជាទិញក្តារមឈូសប្រមាណ៣ពាន់ពីប្រទេសថៃ។ អ្នកនិពន្ធជនជាតិអាមេរិកាំងលាតត្រដាងប្រវត្តិសាស្ត្រសម័យទំនើបរបស់ប្រាសាទអង្គរវត្ត។ រីឯព័ត៌មានអន្តរជាតិវិញមានដូចជា លោក Biden បន្តទទូចឲ្យពលរដ្ឋចាក់វ៉ាក់សំាងកូវីដ១៩។ មនុស្ស៩នាក់ត្រូវបានជាប់ខ្លួនពីបទរៀបចំផែនការដាក់គ្រាប់បែកនៅទីក្រុងហុងកុង។ មនុស្ស៤ស្លាប់ ហើយមនុស្ស២៤នាក់នៅបាត់ខ្លួនដោយសារការបាក់ដីនៅជប៉ុន។ យន្តហោះមួយគ្រឿងដឹកមនុស្ស២៨នាក់បានបាត់នៅប្រទេសរុស្ស៊ី។ សភាអ៊ីស្រាអែលរារាំងច្បាប់ដែលមិនឲ្យធានាប្តី ឬប្រពន្ធប៉ាឡេស្ទីន។ ចំនួនមនុស្សស្លាប់កើនឡើងនៅឯអគារខុនដូបាក់នៅរដ្ឋ Florida។ ឯកអគ្គរដ្ឋទូតចិនលាលែងពីតំណែងនៅរដ្ឋធានីវ៉ាស៊ីនតោន នៅពេលទំនាក់ទំនងរវាងប្រទេសទាំងពីរចុះទាប។ ចិនបង្កើតរូបិយប័ណ្ណឌីជីថលផ្ទាល់ខ្លួន។ អ្នកជំនាញថា គ្រោះរាំងស្ងួតធ្ងន់ធ្ងរនិងភ្លើងឆេះព្រៃបង្ហាញពីការប្រែប្រួលបរិស្ថាន៕
