កម្មវិធីវិទ្យុ
ព័ត៌មានពេលព្រឹក៖ ៥ តុលា ២០២០
ព័ត៌មានសំខាន់ៗអំពីកម្ពុជាមានដូចជា លោកនាយករដ្ឋមន្ត្រី ហ៊ុន សែន ជូនពរលោកប្រធានាធិបតី Donald Trump ឲ្យឆាប់ជាសះស្បើយពីជំងឺកូវីដ១៩។ ពលរដ្ឋខ្មែរអាមេរិកាំងយល់ថា លោកប្រធានាធិបតី Trump ទំនឹងជាធូរស្រាលពីជំងឺកូវីដ១៩ ឆាប់ៗ។ រីឯព័ត៌មានអន្តរជាតិវិញមានដូចជា វេជ្ជបណ្ឌិតព្យាបាលលោក Trump ថា លោកប្រហែលជាអាចចេញពីមន្ទីរពេទ្យបាននៅថ្ងៃច័ន្ទ។ លោក Trump អរគុណអ្នកដែលមកគាំទ្រលោកនៅក្រៅមន្ទីរពេទ្យ។ គណបក្សសាធារណរដ្ឋចង់ផ្អាកការងារព្រឹទ្ធសភា តែមិនផ្អាកសវនាការតែងតាំងចៅក្រមតុលាការកំពូលទេ។ ករណីឆ្លងជំងឺកូវីដ១៩ នៅសហរដ្ឋអាមេរិកកើនឡើងខ្លាំង ពេលអាកាសធាតុត្រជាក់ចូលមកដល់។ មានការរំពឹងទុកខ្ពស់ពីការជជែកដេញដោលបេក្ខជនអនុប្រធានាធិបតីសហរដ្ឋអាមេរិក។ របាយការណ៍៖ ទីក្រុងចិនជាប់ព្រំដែនកូរ៉េខាងជើងជួយកូរ៉េខាងជើងឲ្យគេចផុតពីទណ្ឌកម្មអន្តរជាតិ៕
ព័ត៌មានពេលរាត្រី៖ ៥ តុលា ២០២០
ព័ត៌មានអំពីកម្ពុជាមានដូចជា អ្នកវិភាគ៖ ការវាយកម្ទេចអគារកងទ័ពជើងទឹកជួសជុលដោយអាមេរិក បង្កើនមន្ទិលកម្ពុជាកាន់តែរំកិលទៅរកចិន។ តុលាការកាត់ទោសចាងហ្វាងសារព័ត៌មាន TVFB រឿងបង្ហោះសម្តីរបស់លោកហ៊ុន សែន តែព្យួរទោស។ ស្ថាប័នបោះឆ្នោតគ.ជ.ប.អំពាវនាវឲ្យពលរដ្ឋចុះឈ្មោះបោះឆ្នោត និងពិនិត្យបញ្ជីឈ្មោះ។ កម្មវិធី Hello VOA មានកិច្ចពិភាក្សាអំពី «ផ្នត់គំនិតថ្មីដើម្បីជោគជ័យសម្រាប់ស្ត្រីក្នុងបរិបទទំនៀមទម្លាប់ប្រពៃណី»។ ព័ត៌មានអន្តរជាតិវិញមានដូចជា លោក Trump ចាកចេញពីមន្ទីរពេទ្យមួយសន្ទុះដើម្បីជួបក្រុមអ្នកគាំទ្រ។ ការឆ្លងជំងឺកូវីដ១៩ នៅលើពិភពលោកកើនដល់ជាង ៣៥ លានករណី។ ការប្រយុទ្ធគ្នារវាងអាមេនី និងអាស៊ែបៃហ្សង់បានធ្លាយហួសព្រំដែនតំបន់ជម្លោះ Nagorno-Karabakh។ ធនាគារពិភពលោកថា កុមារអាហ្វហ្គានីស្ថានរាប់លាននាក់មិនបានចូលរៀន៕
