កម្មវិធីវិទ្យុ
ព័ត៌មានពេលព្រឹក
ព័ត៌មានអំពីកម្ពុជាមានដូចតទៅ៖ រដ្ឋាភិបាលកម្ពុជាគាំទ្រសំណើរបស់វិស័យឯកជនសុំពន្យារពេលដក EBA តែថា ជំហររដ្ឋាភិបាលនៅដដែល។ សហគមន៍ខ្មែរក្រោមប្រារព្ធខួបទី៧១នៃការបាត់បង់ទឹកដីទៅវៀតណាម ទោះរំខានដោយជំងឺកូវីដ១៩ក្តី។ មន្ត្រីអង្គការសហប្រជាជឫតិភ្ញាក់ផ្អើលនឹងការបង្ក្រាបលើសិទ្ធិបញ្ចេញមតិក្នុងប្រទេសចំនួន១២ រួមទាំងកម្ពុជាផងដែរ។ ព័ត៌មានអន្តរជាតិមានដូចតទៅ៖ លោកប្រធានាធិបតី ត្រាំ ការពារការថតរូបដ៏ចម្រូងចម្រាសនៅមុខវិហារគ្រិស្តសាសនា ដែលរងការរិះគន់យ៉ាងខ្លាំងពីបណ្ដាមេដឹនាំសាសនាគ្រិស្ត។ សម្ព័ន្ធសង្គ្រោះទន្លេមេគង្គជំរុញឲ្យលុបចោលគម្រោងទំនប់វារីអគ្គិសនីសាណាខាំរបស់ឡាវ។ ផ្សារហ៊ុនអាមេរិកនិងពិភពលោកបន្តកើនតម្លៃ ទោះបីមានបាតុកម្មនិងជំងឺរាតត្បាតក្តី។ នាយករដ្ឋមន្ត្រីអង់គ្លេសនឹងបើកផ្លូវឲ្យពលរដ្ឋហុងកុងសុំសញ្ជាតិអង់គ្លេសបាន ដោយសារច្បាប់ការពារសន្ដិសុខថ្មីរបស់ចិន៕
ព័ត៌មានពេលរាត្រី
ព័ត៌មានសំខាន់ៗអំពីកម្ពុជា សហរដ្ឋអាមេរិក និងតំបន់អាស៊ី មានដូចជា៖ រដ្ឋសភាកម្ពុជាបានអនុម័តសេចក្តីព្រាងច្បាប់ថ្មីចំនួន២ ស្តីពីការប្រឆាំងការលាងលុយកខ្វក់ បន្ទាប់ពីកម្ពុជាត្រូវបានដាក់បញ្ជូលក្នុងបញ្ជីរបស់សហភាពអឺរ៉ុប ជាប្រទេសមានហានិភ័យខ្ពស់។ មន្ត្រីវិទ្យាស្ថានប៉ាស្ទ័រ ឲ្យដឹងថា ការធ្វើតេស្តសំណាករកជំងឺកូវីដ១៩នៅកម្ពុជាបន្តកើនឡើង ខណៈមានការបារម្ភអំពីកង្វះសារធាតុធ្វើតេស្តរកវីរុសកូរ៉ូណា។ ព្រះអង្គ លួន សុវ៉ាត សកម្មជនសិទ្ធិមនុស្សជាសង្ឃល្បីមួយអង្គ ត្រូវបានព្រះមេគណខេត្តសៀមរាប ឲ្យផ្សឹក ក្រោយពីមានការចោទប្រកាន់ពីរឿងវីដេអូសន្ទនាសេ្នហា។ នៅក្នុងកម្មវិធី Hello VOA ប្រចាំខែស្តីពីអាស៊ាន កញ្ញា ពេជ្រ ចាន់រ៉ាឌីន នាយកប្រតិបត្តិរងនៃវិទ្យាស្ថានខ្មែរសម្រាប់សហប្រតិបត្តិការនិងសន្តិភាព ពិភាក្សាអំពី «ប្រធានអាស៊ានសម័យកូវីដ៖ របៀបវារៈជាយុត្តិសាស្ត្ររបស់វៀតណាម»។ អតីតរដ្ឋមន្ត្រីការពារជាតិសហរដ្ឋអាមេរិក ចោទប្រកាន់លោកប្រធានាធិបតី Trump ថាចង់បំបែកបំបាក់សហរដ្ឋអាមេរិក។ រដ្ឋសភាហុងកុងជជែកដេញដោលចុងក្រោយអំពីសំណើច្បាប់អំពីភ្លេងជាតិចិន។ ព័ត៌មានអន្តរជាតិសំខាន់ៗមានដូចជា៖ បាតុកម្មដើម្បីបង្ហាញសាមគ្គីភាពលើបញ្ហាជាតិសាសន៍របស់សហរដ្ឋអាមេរិក បន្តផ្ទុះឡើងនៅទូទាំងពិភពលោក។ ពលរដ្ឋហុងកុងប្រារព្ធពិធីរំឭកខួប៣១នៃការបង្ក្រាបទីលាន Tiananmen និងព័ត៌មានអន្តរជាតិផ្សេងៗទៀត៕
