កម្មវិធីវិទ្យុ
ព័ត៌មានពេលព្រឹក៖ ២៨ តុលា ២០២០
ព័ត៌មានអំពីកម្ពុជាមានដូចជា អតីតអ្នកការទូតសិង្ហបុរី៖ អាស៊ានគួរពិចារណាដកកម្ពុជានិងលាវចេញ។ តុលាការកំពូល សម្រេចឲ្យបន្តស៊ើបអង្កេតលើអតីតអ្នកកាសែតអាស៊ីសេរីក្នុងករណីចារកម្ម។ ព័ត៌មានអន្តរជាតិវិញមានដូចជា អង្គការសហប្រជាជាតិមានអាយុ ៧៥ ឆ្នាំនៅថ្ងៃទី ២៤ ខែតុលា ឆ្នាំនេះ។ និយតករអាមេរិកថា ឱសថសាកល្បងមួយសម្រាប់ព្យាបាលជំងឺកូវីដ១៩ មិនមានប្រសិទ្ធភាពទេ ខណៈប្រទេសកំពុងប្រឈមករណីឆ្លងថ្មីដែលកំពុងកើនឡើង។ តុលាការកំពូលសហរដ្ឋអាមេរិករក្សាទុកសេចក្តីសម្រេចតម្រូវឲ្យសន្លឹកឆ្នោតតាមប្រៃសណីយ៍ទៅដល់មន្ត្រីរដ្ឋ Wisconsin ត្រឹមថ្ងៃបោះឆ្នោត។ មនុស្សរាប់ពាន់នាក់នៅរដ្ឋ Californiaភៀសខ្លួនចេញពីផ្ទះ ដោយសារការរាលដាលនៃភ្លើងឆេះព្រៃ។ ក្រុមបាតុករអាវលឿងក្នុងប្រទេសថៃ បង្ហាញការគាំទ្រចំពោះព្រះមហាក្សត្រ។ នាយករដ្ឋមន្រី្តម៉ាឡេស៊ី ទទួលបានការគាំទ្រពីអតីតគណបក្សកាន់អំណាច។ ករណីផ្ទុះក្នុងសាលាសាសនាអ៊ីស្លាមមួយកន្លែងនៅប្រទេសប៉ាគីសា្ថន សម្លាប់មនុស្សយ៉ាងតិច៨នាក់ និងរបួសជាច្រើននាក់៕
ព័ត៌មានពេលរាត្រី៖ ២៨ តុលា ២០២០
ព័ត៌មានអំពីកម្ពុជាមានដូចជា ខ្មែរអាមេរិកាំងបង្ហាញជំហរផ្សេងគ្នាលើគោលនយោបាយរបស់ប្រធានាធិបតីសហរដ្ឋអាមេរិកលោក Donald Trump ជាមួយប្រទេសផ្តាច់ការ។ គ្រួសារចាត់ទុកការចោទប្រកាន់«អយុត្តិធម៌» ក្នុងករណីសកម្មជនបក្សប្រឆាំងត្រូវចាប់ខ្លួនមិនឲ្យតវ៉ាមុខស្ថានទូតចិន។ អ្នកជំនាញស្នើចិនបង្ហាញទិន្នន័យទន្លេមេគង្គបន្ថែមទៀត។ ព័ត៌មានអន្តរជាតិវិញមានដូចជា កាលពីថ្ងៃអង្គារ បេក្ខជនប្រធានាធិបតីសហរដ្ឋអាមេរិកលោក Trump និងលោក Biden ប្រឹងបន្តឃោសនាបោះឆ្នោតនៅតាមរដ្ឋដែលមានការប្រជែងខ្លាំង។ អង្គការសុខភាពពិភពលោកថា រយៈពេល ៧ ថ្ងៃគិតត្រឹមថ្ងៃអង្គារ មានករណីឆ្លងថ្មីនៃជំងឺកូវីដ១៩ ជិត ៣ លានករណី។ មនុស្ស ២ នាក់ស្លាប់ ២៦ នាក់ទៀតបាត់ខ្លួន នៅពេលព្យុះទីហ្វុង Molave បោកបក់ចំប្រទេសវៀតណាម។ រដ្ឋមន្ត្រីការបរទេសអាមេរិកថា ចិនជា «អ្នកកេងប្រយោជន៍» ពីប្រទេសស្រីលង្កា។ ព្រះមហាក្សត្រម៉ាឡេស៊ីជំរុញឲ្យសភាអនុម័តច្បាប់ថវិកាជាតិឆ្នាំ ២០២១៕
