កម្មវិធីវិទ្យុ
ព័ត៌មានពេលព្រឹក៖ ២៣ កុម្ភៈ ២០២១
ព័ត៌មានអំពីកម្ពុជាមានដូចជា រដ្ឋាភិបាលប្រកាសផ្អាកសាលារៀននៅភ្នំពេញនិងខេត្តកណ្តាលយ៉ាងតិច២សប្តាហ៍ ដើម្បីបញ្ចៀសការឆ្លងកូវីដ។ ក្រុមមន្ត្រីប្តឹងឲ្យដកថ្នាក់ដឹកនាំមន្ទីររៀបចំដែនដីខេត្តប៉ៃលិន។ កម្ពុជារងគ្រោះឆ្លងកូវីដ១៩ចូលសហគមន៍ទ្រង់ទ្រាយធំក្នុងចំណោមជនជាតិចិន ដោយមិនទាន់ដឹងប្រភព។ រីឯព័ត៌មានអន្តរជាតិវិញមានដូចជា ឥណ្ឌូណេស៊ីជំរុញប្រទេសអាស៊ីអាគ្នេយ៍ ឲ្យបង្កើតផែនការមួយដើម្បីឲ្យយោធាមីយ៉ាន់ម៉ា គោរពតាមការសន្យារៀបចំការបោះឆ្នោត។ សហភាពអឺរ៉ុបនឹងដាក់ទណ្ឌកម្មលើប្រទេសមីយ៉ាន់ម៉ា។ ម៉ាឡេស៊ី ប្រឈមការអំពាវនាវឲ្យបញ្ឈប់ការបញ្ជូនជនជាតិមីយ៉ាន់ម៉ាត្រឡប់ទៅប្រទេសកំណើតរបស់គេវិញ។ ឯកអគ្គរដ្ឋទូតអ៊ីតាលីប្រចាំប្រទេសកុងហ្គោ ត្រូវបានសម្លាប់ក្នុងការពួនស្ទាក់បាញ់កាលពីថ្ងៃចន្ទ។ ជនប្រដាប់អាវុធ សម្លាប់ស្ត្រី៤នាក់ដែលធ្វើការផ្នែកសង្គមកិច្ច នៅប្រទេសប៉ាគីស្ថាន។អ្នកដឹកនាំភាពយន្តស្រីផ្តល់នូវទស្សនវិស័យប្លែកៗអំពីតួអង្គស្ត្រី៕
ព័ត៌មានពេលរាត្រី៖ ២៣ កុម្ភៈ ២០២១
ព័ត៌មានអំពីកម្ពុជាមានដូចជា កម្ពុជារកឃើញកូវីដបម្លែងថ្មីក្នុងចង្កោមឆ្លងសហគមន៍ទ្រង់ទ្រាយធំ។ ជនបរទេសនឹងត្រូវបណ្តេញចេញពីកម្ពុជា បើ«មិនសហការ»ក្នុងប្រតិបត្តិការប្រឆាំងជំងឺកូវីដ១៩។ អតីតមេឃុំបក្សសង្គ្រោះជាតិស្រណោះកិច្ចការមិនទាន់សម្រេចមុនបក្សត្រូវរំលាយ។ «រួមសុខរួមទុក្ខ» គឺជាពាក្យស្លោកក្នុងការប្រមូលផ្តុំគ្នានៅសាលាក្រុងឡូវែលប្រឆាំងរដ្ឋប្រហារនៅមីយ៉ាន់ម៉ា។ រីឯព័ត៌មានអន្តរជាតិវិញមានដូចជា សហរដ្ឋអាមេរិកដាក់ទណ្ឌកម្មលើមន្ត្រីយោធាមីយ៉ាន់ម៉ាពីរនាក់បន្ថែមទៀត។ មេដឹកនាំសកម្មជនមីយ៉ាន់ម៉ាប្ដេជ្ញាតតាំងនឹងរដ្ឋប្រហារយោធា។ លោក Biden ចូលរួមរំលែកទុក្ខអ្នកស្លាប់កន្លះលាននាក់ដោយសារជំងឺកូវីដ១៩ នៅសហរដ្ឋអាមេរិក។ តុលាការម៉ាឡេស៊ីផ្អាកការបញ្ជូនពលរដ្ឋមីយ៉ាន់ម៉ា ១.២០០ នាក់ចេញពីប្រទេស។ រដ្ឋសភាកាណាដាកំណត់ថា ទង្វើរបស់ចិនលើជាតិសាសន៍អ៊ុយហ្គ័រគឺជាអំពើប្រល័យពូជសាសន៍។ មេធាវីសិទ្ធិមនុស្សអង់គ្លេសត្រៀមខ្លួនក្លាយជាអគ្គរដ្ឋអាជ្ញាប្រចាំតុលាការឧក្រិដ្ឋកម្មអន្តរជាតិ។ ដោយលោក Alexei Navalny ជាប់ឃុំឃាំង គណបក្សប្រឆាំងរុស្ស៊ី ប្រឈមនឹងអនាគតមិនប្រាកដប្រជា៕
