កម្មវិធីវិទ្យុ
ព័ត៌មានពេលព្រឹក៖ ២២ តុលា ២០២០
ព័ត៌មានសំខាន់ៗអំពីកម្ពុជាមានដូចជា ថ្នាក់ដឹកនាំបក្សប្រឆាំងថា កុំឲ្យរដ្ឋាភិបាលរារាំងចូលប្រទេស ខណៈតុលាការកោះហៅពួកគេចូលសវនាការ។ អ្នកតាមដានថា ២៩ ឆ្នាំក្រោយកិច្ចព្រមព្រៀងទីក្រុងប៉ារីស កម្ពុជាប្រឈមការប្រេះឆានយោបាយ និងការរំលោភសិទ្ធិមនុស្ស។ ទឹកជំនន់សម្លាប់មនុស្សយ៉ាងតិច ៣៤ នាក់ក្នុងប្រទេសកម្ពុជា និងជាង១០០ នាក់ក្នុងប្រទេសវៀតណាម។ លោកហ៊ុន សែន ព្រមានក្រុមបាតុករប្រឆាំងចិននៅទិវារំឭកខួបកិច្ចព្រមព្រៀងសន្តិភាពទីក្រុងប៉ារីស។ រីឯព័ត៌មានអន្តរជាតិវិញមានដូចជា ជប៉ុន និងឥណ្ឌូណេស៊ី ព្រមព្រៀងគ្នាពង្រឹងចំណងទាក់ទងផ្នែកការពារជាតិ និងសេដ្ឋកិច្ច។ មជ្ឈមណ្ឌល CDC ថា មនុស្សជិត៣សែននាក់បានស្លាប់នៅសហរដ្ឋអាមេរិកក្នុងឆ្នាំ២០២០ ហើយ២ភាគ៣ ជាប់ទាក់ទិននឹងជំងឺកូវីដ១៩។ ការរត់ជាន់គ្នានិងការវាយប្រហារនៅកន្លែងផ្សេងៗគ្នានៅអាហ្វហ្គានីស្ថាន បានសម្លាប់មនុស្សរាប់សិបនាក់ និងព័ត៌មានអន្តរជាតិផ្សេងទៀត៕
ព័ត៌មានពេលរាត្រី៖ ២២ តុលា ២០២០
ព័ត៌មានសំខាន់ៗអំពីកម្ពុជាមានដូចជា អង្គការ Human Rights Watch ថា ឧត្តមសេនីយ៍កម្ពុជាប្រព្រឹត្តអំពើពុករលួយនិងទិញសញ្ជាតិស៊ីប។ អតីតអ្នកកាសែតអាស៊ីសេរីសុំឲ្យតុលាការកំពូលបញ្ឈប់កិច្ចស៊ើបសួរក្នុងសំណុំរឿងចារកម្ម។ នៅក្នុងកម្មវិធី Hello VOA ថ្ងៃនេះមានការពិភាក្សាអំពី «គណបក្សសង្គ្រោះជាតិធ្វើបាតុកម្មជុំវិញពិភពលោកប្រឆាំងនឹងចិននៅខួបសន្តិភាពទីក្រុងប៉ារីស»។ រីឯព័ត៌មានអន្តរជាតិវិញមានដូចជា លោក Trump និងលោក Biden នឹងប្រឈមមុខគ្នានៅក្នុងការជជែកដេញដោលលើកចុងក្រោយនៅយប់ថ្ងៃព្រហស្បតិ៍នេះ។ លោកBiden រៃអង្គាសថវិកាបានច្រើនជាងលោក Trump នៅក្នុងយុទ្ធនាការឃោសនាបោះឆ្នោតកន្លងមក។ ទីភ្នាក់ងារស៊ើបការណ៍សម្ងាត់សហរដ្ឋអាមេរិកថា អ៊ីរ៉ង់និងរុស្ស៊ីចាប់ផ្តើមវាយប្រហារថ្មីលើការបោះឆ្នោតសហរដ្ឋអាមេរិក។ នាយករដ្ឋមន្ត្រីថៃលុបចោលបទបញ្ជាដាក់ប្រទេសក្នុងភាពអាសន្ន ទោះជាការតវ៉ានៅបន្តធ្វើក៏ដោយ។ លោក Pompeo នឹងធ្វើទស្សនកិច្ចទៅតំបន់អាស៊ីខាងត្បូង ស្របពេលដែលភាពតានតឹងជាមួយចិនកាន់តែខ្លាំងឡើង៕
