កម្មវិធីវិទ្យុ
ព័ត៌មានពេលព្រឹក៖ ២០ កញ្ញា ២០២១
ព័ត៌មានអំពីកម្ពុជាមាន លោក ហ៊ុន សែន ថាមិនមានការចរចានយោបាយ ហើយការពាររឿងលបចូលស្តាប់កិច្ចប្រជុំផ្ទៃក្នុងបក្សប្រឆាំង។ អាជ្ញាធររាជធានីភ្នំពេញណែនាំឲ្យពលរដ្ឋបែងចែកសំរាមឲ្យបានត្រឹមត្រូវនិងព្រមានផាកពិន័យ។ រីឯព័ត៌មានអន្តរជាតិវិញមាន នាយករដ្ឋមន្ត្រីថៃរួចផុតពីការបោះឆ្នោតដកសេចក្តីទុកចិត្ត។ ការចរចាមិនបានសម្រេចបាននាំឱ្យមានការប្រយុទ្ធគ្នារវាងក្រុមតាលីបង់និងក្រុមចលនាតស៊ូនៅខេត្ត Panjshir។ ការធ្វើចារកម្មកាន់តែមានភាពវៃឆ្លាត ខណៈចិននិងតៃវ៉ាន់ខ្វះការដោះដូរព័ត៌មាន ប៉ុន្តែបានប្រើប្រាស់អ៊ីនធឺណិតជំនួសវិញ៕
ព័ត៌មានពេលរាត្រី៖ ២០ កញ្ញា ២០២១
ព័ត៌មានអំពីកម្ពុជាមាន លោក ហ៊ុន សែន ស្នើតុលាការទម្លាក់ចោលដីកាចាប់ខ្លួនអ្នកវិភាគ លោក សេង សារី។ មន្រ្តីសិទ្ធិមនុស្ស និងអ្នកកាសែត បារម្ភពីការបន្តរឹតត្បិតសេរីភាពនៃការបញ្ចេញមតិ ក្រោយពីនាយករដ្ឋមន្រ្តីគំរាមអ្នកវិភាគខ្លះ។ សកម្មជនម្នាក់នៅស្រុកលំផាត់ ខេត្តរតនគិរី ត្រូវសមត្ថកិច្ចឃាត់ខ្លួន រឿងចោទប្រកាន់ទន្រ្ទានដីព្រៃ។ នៅក្នុងកម្មវិធី Hello VOA ថ្ងៃនេះ មានកិច្ចពិភាក្សាអំពី«បណ្តាញស្រ្តីអ្នកដឹកនាំវ័យក្មេង និងស្រ្តីវ័យក្មេងនៅកម្ពុជា»។ រីឯព័ត៌មានអន្តរជាតិវិញមានដូចជា ការសិក្សារកឃើញថា អ្នកជំងឺកូវីដម្នាក់ក្នុងចំណោម៣នាក់ បានរាយការណ៍ពីរោគសញ្ញារយៈពេលយូរ។ ដំណើរទស្សនកិច្ចរបស់ប្រធានាធិបតីវៀតណាមទៅឡាវ ជាការប្រឹងប្រែងដើម្បីរក្សាឥទ្ធិពល។ អគ្គលេខាអង្គការសហប្រជាជាតិ ព្រមានចិននិងអាមេរិកឱ្យចៀសវាងសង្គ្រាមត្រជាក់ថ្មី។ គណបក្សដែលគាំទ្រដោយរដ្ឋាភិបាលវិមានក្រឹមឡាំង នាំមុខក្នុងការបោះឆ្នោតសភារដ្ឋឌុយម៉ា នៅពេលមានការចោទប្រកាន់ពីការអុកឡុក និងព័ត៌មានមួយចំនួនទៀត៕
