កម្មវិធីវិទ្យុ
ព័ត៌មានពេលព្រឹក៖ ២០ កក្កដា ២០២១
ព័ត៌មានអំពីកម្ពុជាមានដូចជា គ្រឿងញៀនជាង៤តោនត្រូវដុតបំផ្លាញ ខណៈជាង៣តោនទៀតនឹងត្រូវបន្សាបតាមលក្ខណៈបច្ចេកទេសគីមី។ អ្នកតាមដានបារម្ភដំណោះស្រាយនយោបាយមិនទៅមុខ ក្រោយអាជ្ញាធរបដិសេធមិនផ្តល់សិទ្ធិធ្វើនយោបាយឲ្យមន្រ្តីបក្សប្រឆាំង។ រីឯព័ត៌មានអន្តរជាតិវិញមានដូចជា បំពង់ឧស្ម័នធម្មជាតិរុស្ស៊ីជាបញ្ហាសំខាន់មួយនៅក្នុងជំនួបរវាងលោក Biden និងអ្នកស្រី Merkel។ អាមេរិកនិងប្រទេសមួយចំនួនទៀតចោទទីភ្នាក់ងារចារកម្មរបស់ចិនថាជួលពួកអ្នកលួចព័ត៌មានតាមកុំព្យូទ័រ។ ប្រធានាធិបតីកូរ៉េខាងត្បូងលុបចោលទស្សនកិច្ចទៅកាន់ទីក្រុងតូក្យូដែលអាចនឹងមានជំនួបកំពូលជាមួយនាយករដ្ឋមន្ត្រីជប៉ុន។ ក្រុមប្រឆាំងនឹងរដ្ឋប្រហារនៅមីយ៉ាន់ម៉ាធ្វើបាតុកម្មនៅទិវាទុក្ករបុគ្គល។ ពួកបាតុកររិះគន់នាយករដ្ឋមន្ត្រីថៃចំពោះចំណាត់ការលើការរាតត្បាតជំងឺកូវីដ១៩។ សហរដ្ឋអាមេរិកដោះលែងអ្នកជាប់ឃុំនៅច្រកសមុទ្រ Guantanamo ទៅកាន់ប្រទេសម៉ារ៉ុកវិញ។ សវនាការកាត់ក្ដីអតីតប្រធានាធិបតីអាហ្វ្រិកខាងត្បូងពីបទពុករលួយចាប់ផ្ដើមឡើងវិញកាលពីថ្ងៃចន្ទ៕
ព័ត៌មានពេលរាត្រី៖ ២០ កក្កដា ២០២១
ព័ត៌មានអំពីកម្ពុជាមានដូចជា មន្ត្រីសុខាភិបាលថាអ្នកជំងឺកូវីដ១៩ភាគច្រើនស្លាប់ ដោយសារមកព្យាបាលយឺតយ៉ាវ ខណៈក្រសួងនឹងសិក្សាមូលហេតុឲ្យបានច្បាស់លាស់។ អ្នកតស៊ូមតិផ្នែកបរិស្ថានរិះគន់រដ្ឋមន្ត្រីក្រសួងកសិកម្ម រឿងទំនួលខុសត្រូវលើការបង្ក្រាបបទល្មើសព្រៃឈើ។ មន្ត្រីសុខាភិបាលថា ថ្នាំបុរាណចិនជួយសម្រាលរោគសញ្ញា តែមិនជួយព្យាបាលជំងឺកូវីដ១៩ទេ។ វីរុសជំងឺកូវីដ១៩ បំប្លែងថ្មីដែលតា(Delta)៖ កម្ពុជានិងពិភពលោកកំពុងប្រឈមនឹងហានិភ័យសុខាភិបាលធ្ងន់ធ្ងរ។ រីឯព័ត៌មានអន្តរជាតិវិញមានដូចជា រដ្ឋមន្ត្រីការបរទេសអាមេរិក ជួបអ្នកកាសែតអាមេរិកដើមកំណើតអ៊ីរ៉ង់ ដែលជាគោលដៅនៃការចាប់ពង្រត់។ ការដេញដោលក្នុងសវនាការទីមួយក្រោមច្បាប់សន្តិសុខជាតិរបស់ក្រុងហុងកុង ជិតចប់។ លោក Biden ថាមហាក្សត្រហ៊្សកដានីជាសម្ព័ន្ធមិត្តដ៏ខ្លាំងនៅភូមិសាស្ត្រនយោបាយតានតឹង។ មន្ត្រីអ៊ីរ៉ាក់ថា គ្រាប់បែកផ្ទុះតាមដងផ្លូវបានសម្លាប់មនុស្ស៣០នាក់នៅផ្សារក្នុងក្រុងបាកដាដ។ ក្រុមប្រឆាំងហៃទីមិនគាំទ្រនាយករដ្ឋមន្រ្តីដែលត្រូវបានតែងតាំងថ្មី។ គ្រាប់រ៉ុក្កែតត្រូវបានបាញ់លើរដ្ឋធានីរបស់អាហ្វហ្គានីស្ថាន ខណៈប្រធានាធិបតីថ្លែងសុន្ទរកថាក្នុងពិធីបុណ្យសាសនាអ៊ីស្លាម៕
