កម្មវិធីវិទ្យុ
ព័ត៌មានពេលព្រឹក៖ ២០ តុលា ២០២០
ព័ត៌មានសំខាន់ៗអំពីកម្ពុជាមានដូចជា ក្រសួងយុត្តិធម៌ថា មិនមាន «ភាពមិនប្រក្រតី» ក្នុងការពន្លឿនសំណុំរឿងកកស្ទះជិត ២ម៉ឺន៨ពាន់នោះទេ។ គ្រោះទឹកជំនន់បានសម្លាប់មនុស្សយ៉ាងហោចណាស់ ២៥ នាក់នៅកម្ពុជា។ រីឯព័ត៌មានអន្តរជាតិវិញមានដូចជា វិបត្តិជំងឺកូវីដ១៩ ជំរុញឲ្យអ្នកបោះឆ្នោតអាមេរិកជាច្រើននាក់ ចេញទៅបោះឆ្នោតមុនថ្ងៃបោះឆ្នោត។ ការបោះពុម្ព និងលក់សៀវភៅនៅហុងកុង ស្ថិតក្រោមគំនាបនៃច្បាប់សន្តិសុខជាតិថ្មី។ មនុស្សជាង ៤០ លាននាក់នៅជុំវិញពិភពលោក បានឆ្លងជំងឺកូវីដ១៩។ អាមេរិកព្រមានពីអំពើហិង្សាធ្ងន់ធ្ងរនៅអាហ្វហ្គានីស្ថាន អាចនាំឲ្យអន្តរាយកិច្ចព្រមព្រៀងសន្តិភាពជាមួយក្រុមតាលីបង់។ ក្រុមហ៊ុន Nokia នឹងសាងសង់បណ្តាញទូរស័ព្ទលើភពព្រះចន្ទ។ អង់គ្លេសនិងអឺរ៉ុបប្រាប់គ្នាទៅវិញទៅមកកិច្ចការពាណិជ្ជកម្ម ពេលអង់គ្លេសប្រកាសចាកចេញពីសហភាពអឺរ៉ុប៕
ព័ត៌មានពេលរាត្រី៖ ២០ តុលា ២០២០
ព័ត៌មានសំខាន់ៗអំពីកម្ពុជាមានដូចជា សកម្មជនគាំទ្រលោក កឹម សុខា ២នាក់ ត្រូវចោទប្រកាន់ថា«ប្រមាថព្រះមហាក្សត្រ»។ តុលាការច្រានចោលសំណើសុំនៅក្រៅឃុំ និងបណ្តឹងទាស់របស់សកម្មជនសិទ្ធិមនុស្ស។ ខ្មែរអាមេរិកាំងថា បញ្ហាអន្តោប្រវេសន៍ខុសច្បាប់ នឹងត្រូវបន្តឹង បើលោក Trump ជាប់ឆ្នោត។ រីឯព័ត៌មានអន្តរជាតិវិញមានដូចជា ១៥ ថ្ងៃមុនការបោះឆ្នោត ការស្ទង់មតិបង្ហាញថា លោក Biden នាំមុខលោក Trump។ នាយករដ្ឋមន្ត្រីជប៉ុនលោក Suga ធ្វើទស្សនកិច្ចនៅវៀតណាម សម្រាប់ការពិភាក្សាទ្វេភាគី។ សហរដ្ឋអាមេរិកចោទយោធារុស្ស៊ី៦នាក់ ថាបានវាយប្រហារជាសាកលតាមអ៊ីនធឺណិត។ លោក Biden និងលោក Trump ចូលរួមក្នុងវេទិកាសាធារណៈប្រជែងគ្នា និងព័ត៌មានអន្តរជាតិផ្សេងៗទៀត៕
