កម្មវិធីវិទ្យុ
ព័ត៌មានពេលព្រឹក៖ ២ មិថុនា ២០២១
ព័ត៌មានអំពីកម្ពុជាមានដូចជា អនុរដ្ឋមន្រ្តីការបរទេសអាមេរិកជំរុញកម្ពុជារក្សានយោបាយការបរទេសកណ្តាល និងចោទសួរអំពីមូលដ្ឋានកងទ័ពចិន។ សហរដ្ឋអាមេរិកបារម្ភពីវត្តមានយោធាចិននៅកម្ពុជានិងជំរុញឲ្យបើកទូលាយការបោះឆ្នោតខាងមុខ។ ក្រុមសហជីពនៅកាស៊ីណូ Naga រៀបចំបណ្តឹងប្រឆាំងការរំលោភសិទ្ធិការងារ។ ការឆ្លងជំងឺកូវីដ១៩ នៅតាមពន្ធនាគារបន្តកើនឡើង និងមានករណីស្លាប់ម្នាក់នៅខេត្តកំពង់ស្ពឺ។ រីឯព័ត៌មានអន្តរជាតិវិញមានដូចជា អង្គការសុខភាពពិភពលោកនឹងបង្កើតសន្ធិសញ្ញាមួយដើម្បីឆ្លើយតបជំងឺរាតត្បាតជាសាកល។ ហានិភ័យនៃអំពើពុករលួយក្នុងប្រទេសតំបន់បាល់កង់ធ្វើឲ្យបរាជ័យការពង្រីកសមាជិកភាពសហភាពអឺរ៉ុប។ ប្រទេសចិនរកឃើញជំងឺផ្តាសាយបក្សីប្រភេទថ្មី H10N3 ឆ្លងទៅមនុស្សដែលអាចជាករណីទី ១។ មនុស្សរាប់រយនាក់ ជួបជុំគ្នាក្នុងពិធីសាសនាមួយនៅព្រះវិហារគ្រិស្តប្រវត្តិសាស្ត្រក្នុងទីក្រុង Tulsa៕
ព័ត៌មានពេលរាត្រី៖ ២ មិថុនា ២០២១
ព័ត៌មានសំខាន់ៗអំពីកម្ពុជាមានដូចជា អនុរដ្ឋមន្ត្រីការបរទេសអាមេរិកអំពាវនាវឲ្យទម្លាក់ការចោទប្រកាន់លើមន្ត្រីបក្សប្រឆាំង និងបើកលំហសេរីភាពនៅកម្ពុជា។ អនុរដ្ឋមន្ត្រីការបរទេសអាមេរិកសង្ឃឹមថា កម្ពុជានឹងកែប្រែស្ថានភាពសិទ្ធិពលរដ្ឋនិងសិទ្ធិនយោបាយ។ នៅកម្ពុជា មនុស្ស១០នាក់ទៀតស្លាប់ ដោយសារជំងឺកូវីដ១៩ ខណៈករណីឆ្លងបន្តកើនឡើង។ មេធាវីជំរុញការស្វែងរកសកម្មជនថៃដែលបាត់ខ្លួននៅរាជធានីភ្នំពេញមួយឆ្នាំមកហើយ។ នៅក្នុងកម្មវិធីផតខាសថ៍ «កម្ពុជាសម្លឹងទៅមុខ ឬ Envision Cambodia» ភាគទី ១៥ មានកិច្ចពិភាក្សាអំពី «ទស្សនវិស័យនៃប្រព័ន្ធសុខាភិបាលកម្ពុជា»។ រីឯព័ត៌មានអន្តរជាតិវិញមានដូចជា នៅឯពិធីនៅ Tulsa Centennial លោក Biden បង្ហាញវិធានការបង្រួមគម្លាតរវាងអ្នកមាននិងអ្នកក្រដោយសារពូជសាសន៍។ រដ្ឋបាលលោក Biden ផ្អាកការខួងយកប្រេងនៅក្នុងជម្រកសត្វព្រៃ Alaska៕
