កម្មវិធីវិទ្យុ
ព័ត៌មានពេលព្រឹក៖ ១៩ កក្កដា ២០២១
ព័ត៌មានអំពីកម្ពុជាមានដូចជា អាមេរិកជំរុញការស៊ើបអង្កេតបន្ថែមលើឃាតកម្មលោក កែម ឡី ខណៈមន្ត្រីកម្ពុជាថាកុំឲ្យធ្វើអាជីវកម្មនយោបាយ។ រីឯព័ត៌មានអន្តរជាតិវិញមានដូចជា រដ្ឋាភិបាលអាហ្វហ្គានីស្ថាន ប្តេជ្ញាទប់ស្កាត់ការរុលទៅមុខរបស់ក្រុមតាលីបង់ ខណៈពេលអាមេរិកកំពុងដកទ័ព។ ពិភពលោកមិនទាន់ត្រៀមខ្លួនរួចរាល់ដើម្បីទប់ទល់នឹងជំងឺរាតត្បាតនៅឡើយទេ។ លោក Biden ជឿថា«អាមេរិកមកវិញហើយ»តែពួកសម្ព័ន្ធមិត្តរបស់សហរដ្ឋអាមេរិកមិនទាន់ប្រាកដក្នុងចិត្តទេ៕
ព័ត៌មានពេលរាត្រី៖ ១៩ កក្កដា ២០២១
ព័ត៌មានអំពីកម្ពុជាមានដូចជា គ្រឿងញៀនជាង៤តោនត្រូវដុតបំផ្លាញ ខណៈជាង៣តោនទៀតនឹងត្រូវបន្សាបតាមលក្ខណៈបច្ចេកទេសគីមី។ អ្នកតាមដានបារម្ភដំណោះស្រាយនយោបាយមិនទៅមុខ ក្រោយអាជ្ញាធរបដិសេធមិនផ្តល់សិទ្ធិធ្វើនយោបាយឲ្យមន្រ្តីបក្សប្រឆាំង។ តំណាងកម្ពុជាថា«បាតុកម្មស៊ីឈ្នួល»មិនមែនជាការអនុវត្តសិទ្ធិសេរីភាពនោះទេ។ នៅក្នុងកម្មវិធី Hello VOA «សំឡេងជំនាន់ថ្មី» មានកិច្ចពិភាក្សាអំពី «វិបត្តិកូវីដ១៩និងស្ថានភាពទៅថ្ងៃមុខនៃវិស័យអចលនទ្រព្យកម្ពុជា»។ រីឯព័ត៌មានអន្តរជាតិវិញមានដូចជា សហរដ្ឋអាមេរិកដាក់ទណ្ឌកម្មមន្ត្រីចិន៧នាក់ចំពោះការបង្ក្រាបក្នុងទីក្រុងហុងកុង។ ប្រធានាធិបតីអាមេរិកជួបជាមួយព្រះមហាក្សត្រប្រទេសហ៊្សកដានី។ មេដឹកនាំបក្សប្រឆាំងបេឡារុសគ្រោងប្រើទស្សនកិច្ចនៅសហរដ្ឋអាមេរិកដើម្បីស្នើសុំការគាំទ្រ។ ប្រធានផ្នែកសេវាសុខភាពសាធារណៈសហរដ្ឋអាមេរិកថា «ជំងឺរាតត្បាតមិនទាន់ចប់ទេ»។ ប្រទេសអាហ្វហ្គានីស្ថានហៅអ្នកការទូតរបស់ខ្លួនក្នុងប្រទេសប៉ាគីស្ថានត្រឡប់ទៅប្រទេសវិញ បន្ទាប់ពីកូនស្រីរបស់ឯកអគ្គរដ្ឋទូតខ្លួនត្រូវបានចាប់ពង្រត់និងវាយដំ។ មេដឹកនាំតាលីបង់ថាចង់ធ្វើកិច្ចព្រមព្រៀងអាហ្វហ្គានីស្ថាន ខណៈពួកគេកំពុងប្រយុទ្ធ៕
