កម្មវិធីវិទ្យុ
ព័ត៌មានពេលព្រឹក៖ ១៤ មេសា ២០២១
ព័ត៌មានអំពីកម្ពុជាមានដូចជា រដ្ឋាភិបាលនិងមន្ត្រីអង្គការសហប្រជាជាតិខ្វែងគំនិតគ្នាលើវិធានការប្រឆាំងជំងឺកូវីដ១៩។ អតីតមន្ត្រីបក្សប្រឆាំង លោក ថាច់ សេដ្ឋា ទទួលសិទ្ធិធ្វើនយោបាយឡើងវិញ ខណៈប្រឈមបណ្តឹងតុលាការ។ រីឯព័ត៌មានអន្តរជាតិវិញមានដូចជា អាជ្ញាធរអាមេរិកស្នើឲ្យផ្អាកការចាក់វ៉ាក់សាំងកូវីដ១៩ ដែលចាក់តែមួយដូសរបស់ក្រុមហ៊ុន Johnson & Johnson។ អង្គការសុខភាពពិភពលោកព្រមានថាជំងឺរាតត្បាតកូវីដ១៩ «កំពុងឈានដល់របត់ដ៏សំខាន់មួយ»។ រដ្ឋមន្ត្រីការបរទេសអាមេរិកបញ្ជាក់ពី «ការគាំទ្រមិនងាករេ» ដល់ប្រទេសអ៊ុយក្រែននៅក្នុងជំនួបជាមួយរដ្ឋមន្ត្រីការបរទេសអ៊ុយក្រែន។ ប្រទេសហ្វីលីពីន កោះហៅឯកអគ្គរដ្ឋទូតចិនពាក់ព័ន្ធវត្តមាននាវាចិនក្នុងតំបន់ជម្លោះសមុទ្រចិនខាងត្បូង។ កោះតៃវ៉ាន់បានបង្ហាញពីនាវាចម្បាំងថ្មីរបស់កងទ័ពជើងទឹក ស្របពេលដែលប្រទេសចិនកំពុងរំលោភបំពានទៅលើតំបន់ដែនការពារអាកាសរបស់ខ្លួន។ ប្រទេសបុតស្វាណាបើកឲ្យមានរដូវបាញ់សត្វដំរីជិត២៨៧ក្បាល។ សកម្មជនបរិស្ថានអ៊ូហ្គាន់ដាប្រមូលផ្តុំសិស្សសាលាដើម្បីឲ្យពួកគេយល់ពីតម្លៃព្រៃឈើ៕
ព័ត៌មានពេលរាត្រី៖ ១៤ មេសា ២០២១
ព័ត៌មានអំពីកម្ពុជាមានដូចជា មនុស្ស១៧៧នាក់ទៀតឆ្លងកូវីដ១៩ក្នុងព្រឹត្តិការណ៍២០កុម្ភៈ ខណៈករណីស្លាប់កើនឡើងដល់៣៧នាក់។ តំណាងរដ្ឋាភិបាលថាក្រុមអ្នកជំនាញអង្គការសហប្រជាជាតិបង្អាក់បេសកកម្មប្រឆាំងកូវីដ១៩នៅកម្ពុជា។ អ្នកប្រើប្រាស់បណ្តាញសង្គម TikTok ត្រូវចាប់ខ្លួន រឿងរិះគន់ចំណាត់ការបង្ការជំងឺកូវីដ១៩។ ព្រះសង្ឃនិងពុទ្ធបរិស័ទខ្មែរនៅអាមេរិកប្រារព្ធពិធីបុណ្យចូលឆ្នាំខ្មែរ ទោះកូវីដឆ្លងរាតត្បាតខ្លាំង។ រីឯព័ត៌មានអន្តរជាតិវិញមានដូចជា លោក Biden មានគម្រោងដកកងទ័ពចេញពីអាហ្វហ្គានីស្ថាននៅថ្ងៃទី ១១ ខែកញ្ញា។ ក្រុមតាលីបង់ និងរដ្ឋាភិបាលអាហ្វហ្គានីស្ថាននឹងចូលរួមក្នុងការចរចាសន្តិភាពនៅតួកគី។ លោក Biden ព្រមានលោក Putin អំពីការស្ថាបនាកងទ័ពរុស្ស៊ីនៅជិតព្រំដែនអ៊ុយក្រែន។ លោក Biden បន្តគោលជំហរតឹងរ៉ឹងរបស់រដ្ឋបាលលោក Trump លើផ្នែកពាណិជ្ជកម្មចំពោះចិន។ ពួកមេដឹកនាំពិភពលោកសរសើរព្រះអង្គម្ចាស់ Philip ដែលចូលទិវង្គតកាលពីថ្ងៃទី៩ ខែមេសា ក្នុងព្រះជន្ម៩៩វស្សា និងព័ត៌មានអន្តរជាតិមួយចំនួនទៀត៕
