កម្មវិធីវិទ្យុ
ព័ត៌មានពេលព្រឹក៖ ១១ ធ្នូ ២០២០
ព័ត៌មានអំពីកម្ពុជាមាន ក្នុងទិវាសិទ្ធិមនុស្ស១០ធ្នូ សង្គមស៊ីវិលជំរុញឲ្យបញ្ឈប់ការកំណត់មុខសញ្ញាលើសកម្មជន។ ព័ត៌មានអន្តរជាតិវិញមានដូចជា កសិករឥណ្ឌាប៉ះទង្គិចជាមួយប៉ូលិសនៅពេលដែលពួកគេធ្វើបាតុកម្មប្រឆាំងនឹងច្បាប់ថ្មី។ ជម្លោះក្នុងប្រទេសអេត្យូពីធ្វើឲ្យសហគមន៍អេត្យូពីក្រៅប្រទេសបែកបាក់គ្នា។ អង់គ្លេសនិយាយថា កិច្ចចរចាពាណិជ្ជកម្មជាមួយអឺរ៉ុបដល់«ពេលកំណត់ចុងក្រោយ»នៅចុងសប្តាហ៍នេះ។ លោកHunter Biden ត្រូវស៊ើបអង្កេតលើការបង់ពន្ធពាក់ព័ន្ធជំនួញជាមួយនឹងចិន។ អង្គការសហប្រជាជាតិថា ជំងឺរាតត្បាតបានប៉ះពាល់ដល់សិទ្ធិមនុស្សនៅជុំវិញពិភពលោក។ ការប្រព្រឹត្តិខុសខាងផ្លូវភេទធ្វើឱ្យរង្គោះរង្គើថ្នាក់ដឹកនាំជាន់ខ្ពស់របស់ FBI។ ព្រឹទ្ធសភាអាមេរិកមិនបានរារាំងការលក់អាវុធទៅឲ្យអេមីរ៉ាតអារ៉ាប់រួមទេ។ ទីភ្នាក់ងារ NASAបង្ហាញអវកាសយានិកថ្មីសម្រាប់កម្មវិធីភពព្រះចន្ទ។
ព័ត៌មានពេលរាត្រី៖ ១១ ធ្នូ ២០២០
ព័ត៌មានអំពីកម្ពុជាមានដូចជា អ្នកជំនួញចិនស្តុកស្តម្ភដែលធ្លាប់ជួបជាមួយមន្រ្តីជាន់ខ្ពស់កម្ពុជារងទណ្ឌកម្មសហរដ្ឋអាមេរិក។ ប៉ូលិសកម្ពុជាថាមានការបន្លំបង្កើតក្រុមTelegram យកឈ្មោះអគ្គស្នងការនគរបាលជាតិមកប្រើ។ របាយការណ៍ថ្មីបង្ហាញថាជិតមួយភាគបីនៃករណីរំលោភសេពសន្ថវៈនៅកម្ពុជា ពាក់ព័ន្ធនឹងសាច់ញាតិជនរងគ្រោះ។ ព័ត៌មានអន្តរជាតិវិញមានដូចជា គណៈកម្មាធិការពិសេសមួយរបស់សហរដ្ឋអាមេរិកផ្តល់ការគាំទ្រចំពោះការប្រើប្រាស់វ៉ាក់សាំងកូវីដ១៩ដំបូងបង្អស់។ វៀតណាមនិងចក្រភពអង់គ្លេស ជិតបញ្ចប់កិច្ចព្រមព្រៀងពាណិជ្ជកម្មបន្ទាប់ពីការចាកចេញរបស់អង់គ្លេសពីសហភាពអឺរ៉ុប។ សហរដ្ឋអាមេរិកនិងសម្ព័ន្ធមិត្ត គ្រោងពិភាក្សាបញ្ហាសិទ្ធិមនុស្សក្នុងប្រទេសកូរ៉េខាងជើងនៅក្រុមប្រឹក្សាសន្តិសុខអង្គការសហប្រជាជាតិ។ អង្គការស្បៀងអាហារពិភពលោកព្រមានពីការរាតត្បាតនៃការអត់ឃ្លាន ពេលទទួលរង្វាន់ណូបែលសន្តិភាព។ ជនភៀសខ្លួនរ៉ូហ៊ីងហ្កាខ្លះត្រូវគេផ្លាស់ទីលំនៅទៅកោះBhasan Char។ សមាជិកសភាសហរដ្ឋអាមេរិក បញ្ចប់ឆ្នាំប្រវត្តិសាស្ត្រដែលរួមមានការប្តឹងដកតំណែងប្រធានាធិបតី និងការរាតត្បាតជំងឺ។ នាយករដ្ឋមន្ត្រីថៃត្រូវបានរកឃើញថាមិនមានទោស ខណៈដែលក្រុមអ្នកតវ៉ាថ្កោលទោសលើប្រព័ន្ធយុត្តិធម៌របស់ប្រទេសនេះ។ លោក Joe Biden ជ្រើសរើសរដ្ឋមន្ត្រីការបរទេសថ្មី ដែលគាំទ្រសម្ព័ន្ធភាពអន្តរជាតិខ្លាំង។ ប្រធានស៊ើបការណ៍សម្ងាត់សហរដ្ឋអាមេរិកចេញពីតំណែងព្រមានថាចិនព្យាយាមធ្វើឧត្តមភាពសកល៕
